Rregullat e reklamave

Ekrani është bilbordi digjital i Tregu.app. Çdo spot luan vetë, para çdo vizitori, nën logon tonë — prandaj çdo spot shqyrtohet nga stafi para se të dalë, dhe shqyrtimi bëhet duke e parë videon deri në fund.

Çdo reklamë shfaqet gjithmonë me shenjën «Reklamë», e dukshme dhe e pambyllshme. Kjo nuk negociohet: është kërkesë ligjore ndaj konsumatorit dhe e vetmja gjë që e ndan një platformë të besueshme nga një faqe e pistë.

• Bixhoz, basta dhe lojëra fati.
• Kredi të shpejta, «fitim i garantuar», skema investimi, kripto dhe forex.
• Pretendime shëndetësore — kura, mjekime, suplemente që premtojnë rezultate.
• Produkte për të rritur dhe përmbajtje seksuale.
• Alkool i drejtuar te të mitur, ose i paraqitur si zgjidhje problemi.
• Përmbajtje politike gjatë fushatës zgjedhore.
• Imitim marke: logo, emra ose pamje që lënë të kuptohet se je dikush tjetër.
• Çdo gjë që pulson më shpejt se tri herë në sekondë.

Pulsimi i shpejtë nuk është çështje shijeje. Është WCAG 2.3.1, dhe një ekran që ndizet e fiket me atë ritëm mund të provokojë kriza epileptike te njerëz që thjesht po kalojnë pranë tij.

Spotet me të folur duhen dorëzuar me titra të ngulitura në video. Zëri nuk niset kurrë vetë — vizitori e ndez nëse do.

MP4, H.264 (High/Main, 8-bit, yuv420p), audio AAC ose pa audio, 1920×1080 ose 1280×720, raport 16:9, deri 15 sekonda, deri 2,5 Mbps, deri 8 MB.

«yuv420p» nuk është pedanteri. Një eksport 10-bit ose 4:4:4 luhet te Chrome-i i desktopit dhe jep ekran të zi te iPhone-i — pa asnjë gabim, pa asnjë shenjë. Do të dukej në rregull te ne dhe nuk do të ekzistonte te gjysma e vizitorëve që i paguan.

Skedarët që nuk i plotësojnë këto kushte refuzohen me udhëzim se çfarë të ndryshosh te eksporti. Nuk i përpunojmë vetë: një video e ri-kompresuar nga ne nuk do të ishte më ajo që aprovove ti.

1. 1

   Dorëzimi

   Na dërgon skedarin dhe lidhjen ku duhet të çojë klikimi. Lidhja duhet të jetë https.

2. 2

   Shqyrtimi

   Stafi e sheh spotin deri në fund brenda dy ditëve të punës. Nëse refuzohet, merr arsyen me shkrim.

3. 3

   Publikimi

   Spoti nis të luajë në datën e rezervuar dhe merr njoftim kur del në ajër.

Një reklamë e aprovuar mund të ndalet menjëherë nëse del se shkel këto rregulla, nëse lidhja çon diku tjetër nga ç'u aprovua, ose nëse destinacioni bëhet i pasigurt. Në ato raste ndalimi bëhet pa rimbursim, dhe arsyeja të njoftohet.

Nëse e ndalim ne për një arsye që nuk të përket — një gabim yni, një ndërprerje teknike — ditët e humbura shtohen te fundi i periudhës.

Numërojmë një shfaqje kur skeda është e dukshme, të paktën gjysma e kornizës ka qenë në ekran për një sekondë të plotë, dhe videoja ka luajtur vërtet të paktën dy sekonda. Matim edhe sa larg shkon luajtja dhe sa klikime vijnë.

Nuk mbajmë profile vizitorësh, nuk vendosim cookie reklamash dhe nuk të japim listë njerëzish. Vizitori identifikohet vetëm si një hash i përkohshëm i adresës IP, që ndërron çdo javë dhe nuk kthehet dot mbrapsht. Targetimi bëhet sipas kategorisë së faqes, kurrë sipas personit.